O castro de San Vicenzo

Por iniciativa da asociación cultural e dos titulares do monte comunal onde se atopa o castro, chegouse por fin a unha pequena sondaxe arqueolóxica con tres catas que nos achega algo de información sobre os habitantes máis antigos destas terras de Avión.

O castro de San Vicenzo chegou ao século XXI sen escavacións regladas. A pesares dalgunha actuación dos buscatesouros, que sempre destrúen probas e nunca aportan nada ao coñecemento xeral, o castro de San Vicenzo segue intacto e estamos seguros de que pode gardar información sobre os modos de vida, actividades cotiás, relacións con outros castros… que a catas e estudos futuros poderán axudanos a descubrir.

As fotos que se adxuntan corresponden á interesante lección de Arqueoloxía que nos deron os responsables da escavación o 22 de decembro de 2023, insistindo na necesidade de escavacións regladas e describindo os traballos realizados nestas catas.

Destacar a aparición de cerámica típica dos castros, ademais dos restos dunha ánfora romana, e o descubrimento do que puido ser a porta de acceso ao recinto superior.

Os achados nas escavacións, por humildes de parezan, poden dar moita información sobre o seu uso e a súa datación relativa, tendo en conta a súa posición orixinal nos estratos do terreo. Os cazatesouros destrúen esa información, que nunca máis poderá recuperarse.

Parabéns ao equipo de arqueoloxía e aos promotores polo seu interesante traballo e polo esforzo na súa difusión.

Aviso legal · Política de privacidade · Política de cookies · Condicións do servizo · Normas para o usuario